“எங்களை இப்படி அவமதிப்பதற்குப் பதிலாக,
எங்களைச் சேர்க்கும்போதே தயவுசெய்து எங்களுக்கு விஷத்தைக் கொடுத்துவிடுங்கள்!”
“என் குழந்தையை அவர்கள் கொன்றுவிட்டார்கள்!”
முன்னது, ரோஹித் வெமுலா, தான் தற்கொலை செய்துகொள்ளுவதற்கு ஒரு மாதம் முன்பாகத் துணைவேந்தருக்கு எழுதிய கடிதத்ததில் குறிப்பிட்டிருந்த கசப்பும் வலியும் நிறைந்த வரிகள்.
பின்னது, தனது மகன் மும்பை ஐ.ஐ.டி. கல்வி நிறுவனத்தில் பொறியியல் படிப்பை முடித்து, அதன் பின் குடிமைத் தேர்வுகள் எழுதி, ஐ.ஏ.எஸ். அதிகாரியாகத் தேர்வு பெற்று வாழ்க்கையில் வெற்றி பெறுவான் எனக் கனவு கொண்டிருந்த தாயின் கைகளில், அந்த மகனின் உயிரற்ற சடலம் உடற்கூராய்வு செய்யப்பட்டுக் கொடுக்கப்பட்டபோது, அவளது இதயத்திலிருந்து வெடித்துவிழுந்த கதறல்.
மும்பை, இந்தியத் தொழில்நுட்பக் கழகத்தில் (ஐ.ஐ.டி.), எரிசக்தி அறிவியல் மற்றும் பொறியியல் பட்டப் படிப்பு இரண்டாம் ஆண்டு மாணவரான சாஹில் ரவீந்திர வாகோடே கடந்த செப்டம்பர் 18, வெள்ளிக்கிழமை அன்று மாலையில், தனது விடுதி அறையில் தூக்கிட்டுத் தற்கொலை செய்து கொண்டார்.
சாஹில் வாகோடே அட்டவணைச் சமூகத்தைச் சேர்ந்த மாணவர். மகாராஷ்டிராவில் யவத்மால் பகுதியைச் சேர்ந்தவர். அம்மாணவர் அன்று காலையில்தான் தனது இடைநிலைப் பருவத் தேர்வை (Mid Semester Exam) எழுதியிருந்தான். அத்தேர்வு காலை 11 மணிக்குத் தொடங்கி மதியம் 1 மணி வரை நடந்திருக்கிறது. தேர்வு எழுதிவிட்டு அறைக்குத் திரும்பிய ஓரிரு மணி நேரத்திற்குள்ளாகவே, அம்மாணவர் அறையில் இருந்த மின்விசிறியில் தூக்கிட்டுத் தற்கொலை செய்துகொண்டார். தற்கொலைக்கான காரணம் குறித்து அவர் எதையும் எழுதி வைக்கவில்லை.
அதேசமயம், ஐ.ஐ.டி. நிர்வாகம் தனது அதிகாரப்பூர்வ எக்ஸ் தளப் பக்கத்தில் சாஹில் வாகோடேவின் தற்கொலை குறித்து, கையெழுத்திடப்படாத அறிக்கையொன்றைச் சம்பவத்தன்று மதியம் 3.23-க்குப் பதிவிட்டது. அவ்வறிக்கையில், “காலையில் நடந்த தேர்வின்போது அம்மாணவன் தனது கைபேசியைப் பயன்படுத்தியது கண்டுபிடிக்கப்பட்டது. அம்மாணவன் வினாக்களை சாட்-ஜி.பி.டி. (ChatGPT)-யில் பதிவேற்றி விடைகளைத் தேடியிருக்கிறான். எனினும், அம்மாணவன் மீது இதற்காக எவ்வித ஒழுங்கு நடவடிக்கையும் எடுக்கப்படவில்லை. துறைத்தலைவர், ஆசிரியர், புல ஆலோசகர் ஆகியோர் இது தொடர்பாக அம்மாணவனோடு விவாதித்து, ஆலோசனையும் வழங்கியதோடு, இச்சம்பவம் அவனது படிப்பை எவ்விதத்திலும் பாதிக்காது என்ற உத்தரவாதத்தையும் அவனிடம் அளித்தனர்” எனக் குறிப்பிடப்பட்டிருந்தது.
மிகவும் பெருந்தன்மைமிக்கதாகத் தோன்றும் இந்த அறிக்கையின் உட்பொருள் அம்மாணவனை அவமதிக்கும் நயவஞ்சக நோக்கத்தைக் கொண்டிருக்கிறது. “சாஹில் வாகோடே தேர்வில் காப்பியடிக்க முயன்றபோது கையும் களவுமாகப் பிடிபட்டான். அந்த அவமானம் தாங்காமல் தற்கொலை செய்துகொண்டான்.”
மாண்டுபோன மாணவன் சாட்சி சொல்லவரப் போவதில்லை என்ற தைரியத்தில் வெளியிடப்பட்ட அறிக்கையாகக் கூட இது இருக்கலாம். ஏனென்றால், இடைநிலை பருவத் தேர்வு மதியம் ஒரு மணிக்கு முடிந்திருக்கிறது. ஐ.ஐ.டி. நிர்வாகத்தின் அறிக்கை மதியம் 3.23-க்குப் பதிவேற்றப்பட்டிருக்கிறது. இந்த இடைப்பட்ட இரண்டு மணி நேரத்திற்குள்ளாகத்தான் இத்தற்கொலை நடந்திருக்கிறது.
நிர்வாகத்தின் அறிக்கை வெளிவருவதற்கு முன்பாக சாஹில் வாகோடே இறந்துபோனது குறித்த தகவல் அவனது பெற்றோர்களுக்குத் தெரியப்படுத்தப்பட்டதா எனத் தெரியவில்லை. அப்படியே தெரிவிக்கப்பட்டிருந்தாலும், அவர்கள் இந்த இரண்டு மணி நேரத்திற்குள்ளாக யவத்மாலில் இருந்து மும்பைக்கு வந்திருக்க வாய்ப்பேயில்லை. காவல்துறைக்குத் தகவல் தெரிவிக்கப்பட்டு, அவர்கள் விசாரணையைத் தொடங்கியதாகவும் தெரியவில்லை.
இந்த நடைமுறைகள் எல்லாம் தொடங்குவதற்கு முன்பாக அல்லது முடிவதற்கு முன்பாக, அதாவது, ஒரு சந்தேகத்திற்குரிய மரணம் குறித்து முறையான காவல்துறை விசாரணை தொடங்குவதற்கு முன்பே, இறந்துபோன மாணவனின் மீதே முழுப் பழியையும் போட்டுத் தன்னை யோக்கியவனாகக் காட்டிக்கொண்டுவிட்டது, ஐ.ஐ.டி. நிர்வாகம்.
ஐ.ஐ.டி. நிர்வாகத்தின் அறிக்கை உண்மையா அல்லது ஜோடிக்கப்பட்ட கதையா என்ற சந்தேகம் எழுவது தவிர்க்க முடியாதது. அதனை உண்மை என வைத்துக்கொண்டால்கூட, ஒரு சந்தேகத்திற்குரிய மரணத்தில் நிர்வாகம் தனது தரப்பு விளக்கத்தை அளிக்க வேண்டிய இடம் காவல்துறை விசாரணையில்தானே தவிர, அதனை அவசர அவசரமாகப் பொதுவெளியில் விட வேண்டிய அவசியமில்லை.
சாஹில் வாகோடே தற்கொலைக்குத் தள்ளப்பட்டார் என்று அவனது பெற்றோர்கள் மட்டுமல்ல, சம்பவத்தன்று தேர்வு எழுதிய சில மாணவர்களும் பத்திரிகைகளிடம் கூறியிருக்கிறார்கள்.
“சாஹில் வாகோடே முதலாம் ஆண்டில் கல்வி நிலையம் குறித்துத் தங்களிடம் எந்தப் புகாரும் கூறியதில்லை. ஆனால், அவன் இரண்டாம் ஆண்டில் நுழைந்த பிறகு, தன் மீது சாதியப் பாகுபாடு காட்டப்படுவதாகவும், கடந்த மூன்று மாதங்களாகச் சாதிரீதியிலான
This content is locked. Only accessible for Registered Users.
If your aren't registered yet, then
