நிமிடங்களுக்கும் யுகங்களுக்கும் இடையே
வழிபாடு தொடங்கும்போது
ரூபமாகவும் அரூபமாகவும்
நெருப்பு எரியட்டும்
தணல்களை
ஊதி ஊதிப் பெருக்கிட
இரை தேடும்
தீப் பிழம்புகள்
என் உள்ளங்கையில் இருந்தே
பிறக்கின்றன
காற்றைப் பற்றிப் பிடித்தெரியும்
புல் குருத்துகள்
வாதையின் உருக்கம் கொள்கின்றன
கனியாப் பருவங்களின்
புலர்வை
மந்தாரமாய்த் தவித்த
சருமத்தின் கொய்யா வாசனையை
படையல் இடுவேன்
அந்நரம்புகளில்
திரவம் உறிஞ்சும்
இலை மூடிய
பச்சைப்புழுவின் தியானத்தில்
ஊற்று வெளிப்படாப் பாறைகள்
வெடித்துப் பிளக்கின்றன.
m
நாளையைச் சூழ்ந்திருக்கும்
அடுக்குச் சுழல்கள்
அவற்றினுடைய
வடிவப் பாங்கான பயணத்தின் மேட்டிலும்
பள்ளத்திலும் கவிந்திருக்கின்றன
நேற்றின் அடியில்
புதைத்தவற்றின்
ஒன்றிலும் துடிப்பில்லை
சுருள் விரிந்து நகரும்
மேகங்கள் நிறைந்த
புலரொளிக் காலமாக உருவாகினேன்.
புதிய கூவல்களினால்
தீயொளி மூட்டும்
பறவைகள்
புகல்தேடும் திசைகளுக்கு
விரைந்து வருகின்றன
வெற்று நிச்சலனம்
விழுங்கிய நாடித்துடிப்புகளின் ஓசை
சுவனப் பனியோடுகளில் எதிரொலிக்கிறது.
